ആമയുടെ ബുദ്ധി .... അനുബന്ധം....

             ഭൂമുഖത്ത് ആമകള്‍ ഉണ്ടായിട്ട് 20 കോടി വര്‍ഷങ്ങളായെന്നാണ് പറയപ്പെടുന്നത്. സസ്തനികളും പക്ഷികളും പാമ്പുകളും പല്ലികളും ഒക്കെ ഉണ്ടാവുന്നതിനും വളരെ മുന്‍പ് എന്നര്‍ഥം. ആദ്യകാലത്ത് ആമകള്‍ക്ക് വലിയ പല്ലുകള്‍ ഉണ്ടായിരുന്നത്രേ. അതല്ലാതെ ഇന്നത്തെ ആമകളുമായി വലിയ രൂപവ്യത്യാസമൊന്നും അവയ്ക്ക് ഇല്ലായിരുന്നെന്നാണ് ശാസ്ത്രകാരന്മാര്‍ പറയുന്നത്.

              175 വര്‍ഷം വരെ ജീവിച്ച ആമകള്‍ ഉണ്ട്. ഓസ്ട്രേലിയയിലെ ക്യൂന്‍സ്‌ലാന്റിലെ മൃഗശാലയിലെ ഹാരിയറ്റ് എന്ന ആമ 2006 ജൂണ്‍ 23 ന് മൃതിയടഞ്ഞപ്പോള്‍ അതിന് 176 വയസ്സുണ്ടായിരുന്നെന്ന് രേഖപ്പെടുത്തിയിട്ടുണ്ട്. വടക്കെ അമേരിക്കയിലാണ് ഏറ്റവും അധികം ഇനം ആമകള്‍ ഉള്ളത്. എന്നാല്‍ യൂറോപ്പില്‍ ആകെ രണ്ടിനം കടലാമകളും മൂന്നിനം ആമകളും മാത്രമാണുള്ളത്.
           തീരെ ചെറിയ ആമകള്‍ മുതല്‍ വളരെ ഭീമാകാരന്മാര്‍ വരെ ഇവന്റെ കുടുംബത്തില്‍ ഉണ്ട്.  പല രാജ്യങ്ങളിലും ആമയെ വീട്ടില്‍ ഓമനിച്ചു വളര്‍ത്തുന്നുണ്ട്.

           അറുപതോളം അസ്ഥികള്‍ ചേര്‍ന്നതാണ് ആമയുടെ തോട്. അതിനു മുകളില്‍ കട്ടിയുള്ള ചര്‍മ്മത്തിന്റെ ആവരണവുമുണ്ട്. നല്ല കാഴ്ച ശക്തിയും ഘ്രാണശക്തിയും ഉള്ള ആമയുടെ തോടിനു പുറത്തു പോലും നാഡികളുടെ അഗ്രമുണ്ട്.

ചെറിയ ചെടികളും കളകളും ഒക്കെയാണ് ഇവയുടെ ആഹാരം. കടലാമകള്‍ ചെറു മത്സ്യങ്ങളെയും അകത്താക്കാറുണ്ട്. ആപ്പിളും തക്കാളിയും ചെമ്പരത്തിപ്പൂവും ഒക്കെ ആമകള്‍ക്ക് ഇഷ്ടാഹാരം തന്നെ. 

 

തക്കാളി കൊതിയോടെ കഴിക്കുന്ന ആമച്ചാരെ കാണാം...



ഇനി ഇവന്റെ കുളി കാണാം...


ഒരു കുസൃതിക്കാരന്‍ നായയുമൊത്ത് കളിക്കുന്നത് കണ്ടോ...


ഇനി പതിവുപോലെ നമുക്ക് ഒരു ആമയെ വരയ്ക്കാന്‍ പഠിക്കാം, അല്ലേ

Comments

കുറുക്കന്റെ കഥ....

                   കുറുക്കന്‍ ശരിക്കും നായയുടെ കുടുംബത്തില്‍പ്പെട്ട രാത്രീഞ്ചരന്മാരാണ് കുറുക്കന്മാര്‍. ഏതാണ്ട് 21 ഇനത്തില്‍പ്പെട്ട കുറുക്കന്മാരുണ്ടെന്നാണ് കണക്ക്. മുയലുകള്‍ പോലെയുള്ള ചെറിയ സസ്തനികളെയും, പക്ഷികളെയും ഒക്കെയാണ് ഇവന്റെ പ്രധാന ഭക്ഷണം. ചിലപ്പോള്‍ തനി സസ്യാഹാരവും ഇവന് ഇഷ്ടം തന്നെ. പൊതുവേ വളരെ ബഹളക്കാരനൊന്നുമല്ലാത്ത ഇവന്‍ വളരെ സൂത്രശാലിയാണ്. ഏതാണ്ട് ഒരു വലിയ പൂച്ചയോളം വലിപ്പമുള്ള ചുവന്ന കുറുക്കനാണ് നമ്മുടെ നാട്ടില്‍ സാധാരണ കണ്ടുവരുന്നത്. ഏതാണ്ട് 353 – 45 ഇഞ്ച് പൊക്കം വയ്ക്കുന്ന ഇവയ്ക്ക് ഉദ്ദേശ്യം 7 കിലോഗ്രാമോളം ഭാരമാണുള്ളത്.

                നായയുടെ കുടുംബത്തില്‍പ്പെട്ടവനാണെങ്കിലും പൂച്ചയുടെ ചില പ്രകൃതങ്ങളും സ്വഭാവസവിശേഷതകളും കുറുക്കനുണ്ട്. കുറുക്കന്റെ കണ്ണുകളും, നഖം ഉള്ളിലേയ്ക്ക് വലിയ്ക്കാനുള്ള കഴിവും പൂച്ചയുടെതു പോലെ തന്നെ. കൂടാതെ, ഇരയുടെ പ്രാണവേദന കണ്ടാസ്വദിച്ച് ‘കളിപ്പിക്കുന്ന’ പൂച്ചയുടെ സ്വഭാവം ഇവനുമുണ്ട്.

പത്തുമാസം പ്രായമാകുമ്പോള്‍ പ്രായപൂര്‍ത്തിയാകുന്ന ഇവ 50-60 ദിവസത്തെ ഗര്‍ഭകാലത്തിനൊടുവില്‍ 4-5 കുഞ്ഞുങ്ങള്‍ക്ക് ജന്മം നല്‍കും. വനത്തില്‍ 4-5 വര്‍ഷം മാത്രം ശരാശരി ആയുസ്സുള്ള കുറുക്കന് മൃഗശാലയിലും മറ്റും 10-15 വര്‍ഷത്തെ ആയുസ്സുണ്ട്.

മണിക്കൂറില്‍ 50 കിലോമീറ്ററോളം വേഗത്തില്‍ ഓടാന്‍ ഇവനു കഴിയും. അപാരഘ്രാണശക്തിയും കുറുക്കനുണ്ട്.

ജപ്പാനില്‍ കുറുക്കന്‍ വളരെ പവിത്രമായ മൃഗമാണ്.

സുന്ദരക്കുട്ടന്മാരായ കുറുക്കന്‍ കുട്ടന്മാരെ ഒന്നു കാണാം

നമുക്കിവനെ ഒന്ന് വരയ്ക്കാന്‍ ശ്രമിക്കാം

ഇനി നമുക്ക് നമ്മുടെ മിടുക്കനായ മുയലിനെക്കുറിച്ച് ചിലത് മനസ്സിലാക്കാം. നമ്മുടെ വീട്ടില്‍ ഓമനയായി വളര്‍ത്തുന്ന മുയലിനെ കഥാപാത്രമാക്കി ഒരുപാട് കഥകള്‍ മുത്തശ്ശിമാര്‍ പറഞ്ഞു തന്നിട്ടില്ലേ. മുയലിന്റെ പല്ലുകള്‍ എപ്പോഴും വളര്‍ന്നുകൊണ്ടിരിക്കും. ഏതാണ്ട് ഒരു മാസത്തോളം ഗര്‍ഭകാലമുള്ള മുയലിന്റെ പരമാവധി ആയുര്‍ദൈഘ്യം പത്ത് വര്‍ഷമാണ്. വളരെ ഉയരത്തിലും ദൂരത്തിലും ചാടാന്‍ മുയലിനു കഴിയും.

ഇനി ഒരു സുന്ദരക്കുട്ടനെ കാണാം...

നമുക്കൊരു മുയലിനെ വരയ്ക്കാന്‍ ശ്രമിച്ചാലോ

Comments

ഉപകാരത്തിന്റെ കഥ.... അനുബന്ധം....

                        കുഞ്ഞുങ്ങളേ, ഒരു ജീവജാലത്തെയും ഉപദ്രവിക്കരുത് എന്ന സന്ദേശമാണ് ഈ കഥയുടെ ഉദ്ദേശ്യം. ഇന്ന് നമ്മുടെ ജീവിതത്തില്‍ ഈച്ചയെക്കൊണ്ട് പ്രത്യേകിച്ച് വലിയ ഉപകാരം ഒന്നും തന്നെയില്ല. എന്നാല്‍ വൃത്തിയില്ലാത്ത ചുറ്റുപാടില്‍ മുട്ടയിട്ട് പെരുകുന്ന ഇവ പലപ്പോഴും പലതരം അസുഖങ്ങള്‍ പരത്തുകയും ചെയ്യും. അതായത്, നമ്മുടെ പരിസരം നാം ശുചിയായി സൂക്ഷിച്ചാല്‍ അവിടെ ഈച്ചകള്‍ ഉണ്ടാവില്ല തന്നെ. വൃത്തിയില്ലാത്ത ചുറ്റുപാട് ഉണ്ടാക്കിയിട്ട് ഈച്ചയെ പഴിച്ചിട്ട് കാര്യമില്ല. അതിന് വളരാനുള്ള അന്തരീക്ഷമുണ്ടായാല്‍ ഈച്ച പെരുകുക തന്നെ ചെയ്യും. (കൂട്ടുകാരേ, ഇനി, ഈച്ചയെക്കൊണ്ട് മനുഷ്യന് എന്തെങ്കിലും ഉപയോഗം ഉണ്ടെങ്കില്‍ അത് കമന്റിലൂടെ പങ്കു വയ്ക്കണേ).

                      ഇനി നമുക്ക് ഇവനെക്കുറിച്ച് ചില കാര്യങ്ങള്‍ മനസ്സിലാക്കാം... ലോകത്ത് ഏതാണ്ട് 3 ലക്ഷം ഇനത്തിലുള്ള ഈച്ചകള്‍ ഉണ്ട്. ഒരിഞ്ചിന്റെ ഇരുപതിലൊരംശം മുതല്‍ മൂന്നിഞ്ച് വരെ നീളമുള്ളവ. 30 ദിവസത്തോളം വരെ ആയുസ്സുള്ള ഇവ തന്റെ ജീവിതകാലത്തില്‍ ഏതാണ്ട് 3000 മുട്ടകള്‍ വരെയിടും; ഒറ്റത്തവണ 75 മുതല്‍ 150 വരെ മുട്ടകളിടും!!! സാധാരണ ഷഡ്പദങ്ങള്‍ക്ക് നാല് ചിറകുകള്‍ ഉള്ളപ്പോള്‍ ഈച്ചയ്ക്ക് രണ്ട് ചിറകുകളേ ഉള്ളൂ. സെക്കന്റില്‍ 200 പ്രാവശ്യം വരെ ചലിപ്പിച്ചാണ് ഇവന്റെ പറക്കല്‍. നിലം തൊട്ടാലുടനേതന്നെ ചിറകടി നിശ്ചലമാകുകയും ചെയ്യും.

നാനൂറ് ലെണ്‍സുകളോളമുള്ള രണ്ട് കണ്ണുകളാണ് ഇവനുള്ളത്. കാഴ്ചശക്തിയില്‍ അത്ര മെച്ചമല്ലെങ്കിലും പെട്ടെന്നുള്ള ചലനങ്ങള്‍ ഇവന് തിരിച്ചറിയാനാകും. കൊമ്പുകള്‍ കൊണ്ടാണ് ഇവ മണം പിടിക്കുന്നത്.

നമ്മുടെ വീടും പരിസരവും ശുചിയായി സൂക്ഷിച്ചില്ലെങ്കില്‍ തീര്‍ച്ചയായും അവിടെ ഈച്ചയുണ്ടാവും. അത് മാലിന്യങ്ങളില്‍ വസിച്ച്, പലതരം അസുഖങ്ങളും പരത്തും. ഈച്ചയെ നശിപ്പിക്കുന്നതിനെക്കാള്‍ നല്ലത് ഈച്ചയ്ക്ക് വളരാനുള്ള സാഹചര്യങ്ങള്‍ ഉണ്ടാക്കാതിരിക്കുകയാണ്. ടൈഫോയ്ഡ്, കോളറ, മലമ്പനി, ക്ഷയം, ആന്ത്രാക്സ്, പ്ലേഗ് തുടങ്ങിയ രോഗങ്ങള്‍ പരത്തുന്നതില്‍ മറ്റ് ചില ജീവികള്‍ക്കും ഉള്ളത് പോലെ തന്നെ ഈച്ചയ്ക്കും വലിയ പങ്കുണ്ട്.

ഈച്ചയെക്കുറിച്ചുള്ള ഒരു ചെറിയ ചിത്രീകരണം കാണാം...

ഈച്ച ആഹാരം കഴിക്കുന്നത് കാണൂ...

ഈച്ചയ്ക്ക് വായ കൊണ്ട് ഭക്ഷിക്കാന്‍ പറ്റാത്തതിനാല്‍ അവ ആഹാരത്തിലേയ്ക്ക് ഉമിനീര്‍ വര്‍ഷിക്കുന്നു. അങ്ങനെ അലിയുന്ന ആഹാരം ഉള്ളിലേയ്ക്ക് വലിച്ചെടുക്കുന്നു. ഇതാ, ഇത് പോലെ...

ഇനി ഇവനെയൊന്ന് വരച്ച് നോക്കിയാലോ...

comments