കൂട്ടുകാരേ, എനിയ്ക്ക് വായനയിലൂടെയും, ചുറ്റുപാടുകളുടെ നിരീക്ഷണത്തിലൂടെയും, കേട്ടറിവുകളിലൂടേയും മറ്റും കിട്ടിയ വളരെ പരിമിതമായ അറിവുകളാണ് ഇവിടെ പങ്കുവയ്ക്കുന്നത്. ഈ വിഷയങ്ങളെക്കുറിച്ച് കൂടുതല്‍ അറിയാവുന്ന കൂട്ടുകാര്‍, കമന്റിലൂടെയും മറ്റും അവരുടെ അറിവുകള്‍ ദയവായി ഇവിടെ പങ്കു വയ്ക്കുമല്ലോ... അങ്ങനെ നമുക്കെല്ലാവര്‍ക്കും കൂടി ഈ സമ്പാദ്യപ്പെട്ടി സമ്പന്നമാക്കാം...നന്ദി....

Tuesday, April 13, 2010

ഗീതാഗീതിയായ് വന്ന കഥ കഥ പൈങ്കിളി...... (അനുബന്ധം)

ലോകത്ത് ഏറ്റവും അധികം പേര്‍ വളര്‍ത്ത് മൃഗമായി ഓമനിക്കുന്നത് പൂച്ചയെയാണ്. മനുഷ്യനോട് പെട്ടെന്ന് ഇണങ്ങുന്നതും, അതിന്റെ ഓമനത്തവും, പരിപാലനത്തിലെ എളുപ്പവും, എവിടെയും അഡ്ജസ്റ്റ് ചെയ്ത് ജീവിക്കുന്നതും ഒക്കെയാണ് പൂച്ചയെ പ്രിയങ്കരിയാക്കുന്നത്.
മൃഗങ്ങളില്‍ ബുദ്ധിശക്തിയുടെ കാര്യത്തില്‍ മുന്നില്‍ പൂച്ച തന്നെയാണ്. കുരങ്ങുകളും, ചിന്‍പന്‍സിയും മാത്രമാണ് പൂച്ചയെക്കാള്‍ മികച്ച IQ പ്രകടിപ്പിക്കുന്നത്. പൂച്ച, അതിന്റെ ചുറ്റുപാടില്‍ നിന്നും, അനുഭവങ്ങളില്‍ നിന്നും, നിരീക്ഷണത്തില്‍ നിന്നുമൊക്കെ പാഠങ്ങളുള്‍ക്കൊള്ളുന്നു. എല്ലാ കാര്യത്തിലും സ്വന്തമായ അഭിപ്രായവും തീരുമാനവും പൂച്ചക്കുണ്ട്. അതിന്റെ ഒരിക്കലും അനുസരിപ്പിക്കാന്‍ പറ്റില്ല, അവന് ബോദ്ധ്യം വന്നാലേ അവന്‍ എന്തും ചെയ്യൂ. ഓര്‍മ്മ ശക്തിയില്‍ നായയെക്കാള്‍ പതിന്മടങ്ങ് മുന്നിലാണത്രേ പൂച്ചകള്‍; അവര്‍ ആവശ്യമുള്ള കാര്യം മാത്രമേ ഓര്‍ത്ത് വയ്ക്കാറുള്ളൂ എന്നതാണ് സത്യം. സിംഹത്തിന്റെയും പുലിയുടെയും ഒക്കെ കുടുംബക്കാരിയാണ് ഈ ഓമനക്കുട്ടി. കുഞ്ഞുങ്ങളെ വളര്‍ത്തുന്നതും, ഇരപിടിക്കാന്‍ പഠിപ്പിക്കുന്നതും, മുഖഭാവവും ഒക്കെത്തന്നെ സമാനമല്ലേ. നായ എപ്പോഴും നയിക്കപ്പെടാന്‍ ഇഷ്ടപ്പെടുമ്പോള്‍, പൂച്ച സ്വന്തം കാര്യം സ്വയം നോക്കിക്കോളും, കുറച്ച് കുണുങ്ങലും കിന്നാരവും ഒക്കെ ഇഷ്ടപ്പെടുമെങ്കിലും.
ഭൂമിയിൽ ഏതാണ്ട് 33 ഇനം പൂച്ചകൾ ഉണ്ടെന്നാണ് കണക്ക്. 60-65 ദിവസമാണ് പൂച്ചയുടെ പ്രജനന കാലം. മറ്റ് മാംസഭുക്കുകളെപ്പോലെ തന്നെ, പൂച്ചക്കുട്ടികളും ജനിച്ച് ഏതാണ്ട് ഒരാഴ്ച്ച കഴിഞ്ഞാണ് കണ്ണ് തുറക്കുന്നത്. പൂർണ്ണവളർച്ചയെത്തിയ ഒരു പൂച്ചയ്ക്ക് 30 പല്ലുകൾ ഉണ്ടായിരിക്കും - മുകളിലെ നിരയിൽ 16 ഉം, താഴെ 14 ഉം. മനുഷ്യർക്കുള്ളതിനെക്കാൾ 30 കശേരുക്കൾ കൂടുതലുണ്ട് മാർജ്ജാരന്.
ചില സമയം പൂച്ചകൾ വീടിനു ചുറ്റും നിൽക്കുന്ന ചെടികൾ തിന്നുന്നത് കണ്ടിട്ടില്ലേ? ദഹനപ്രക്രിയ സുഗമമാക്കാനാണ് ഇങ്ങനെ ചെയ്യുന്നത്.
വൃത്തിയുടെ കാര്യത്തില്‍ ഏറ്റവും ശ്രദ്ധ ഇവള്‍ക്കുതന്നെ. ഉണര്‍ന്നിരിക്കുന്ന സമയത്തിന്റെ മൂന്നിലൊന്നും സ്വന്തം ശരീരം വൃത്തിയാക്കാന്‍ പാടുപെടുന്നത് കണ്ടിട്ടില്ലേ ഈ സുന്ദരി. വെള്ളത്തില്‍ ചവിട്ടനുള്ള മടിയും ഈ വൃത്തി കാരണമാണ്. ദിവസത്തില്‍ ഏതാണ്ട് 16 മണിക്കൂറും പൂച്ച ഉറക്കമായിരിക്കും.
സ്റ്റൈലില്‍ വമ്പത്തിയാണ് ഈ സുന്ദരി; കേട്ടിട്ടില്ലേ ക്യാറ്റ് വാക്ക് അഥവാ പൂച്ചനടത്തം. നമ്മുടെ സൌന്ദര്യ മത്സരങ്ങളിലെ സുന്ദരിമാരുടെ നടത്തം ഈ പൂച്ച സുന്ദരിയെ അനുകരിച്ചല്ലേ...
 പൂച്ചക്കുഞ്ഞുങ്ങളുടെ കൂട്ടത്തിന് kindle എന്നും, മുതിർന്ന പൂച്ചകളുടെ കൂട്ടത്തിന് clowder എന്നും ആണ് പേര്. പൂച്ചയെ ഇഷ്ടപ്പെടുന്നവരെ Ailurophile എന്നാണ് അറിയപ്പെടുന്നത്..... നമ്മുടെ കൂട്ടത്തിൽ ഒരുപാട് Ailurophiles ഉണ്ടല്ലോ, അല്ലേ....
ഇനി നമുക്ക് ചില കുസൃതിപ്പൂച്ചകളുടെ പ്രകടനങ്ങൾ കാണാം....


ഇനി ഈ പൂച്ചയെ ഒന്ന് വരയ്ക്കാൻ ശ്രമിച്ചാലോ കുഞ്ഞുങ്ങളേ....




അയ്യോ, പാവം ഈച്ചയെ വിട്ടുപോയി, അല്ലേ? സാരമില്ല.... നമ്മുടെ വീട്ടിൽ കാണുന്ന സാധാരണ ഈച്ച ഒരു ഷഡ്പദം ആണ് (6 കാലുകൾ ഉള്ളത്). ചിത്രശലഭങ്ങളുടെതു പോലെയുള്ള ജീവിത ചക്രമാണ് ഈച്ചയ്ക്കുള്ളത്... സാധാരണ ഒരു ഈച്ചയുടെ ജീവിതകാലം 15-25 ദിവസങ്ങളാണ്. അതിന്റെ കണ്ണുകൾ കണ്ടിട്ടില്ലേ, അതിന് 360 ഡിഗ്രി ചുറ്റുവട്ടത്തെ കാഴ്ച്ചകൾ കാണാം. പ്രത്യേകിച്ച് ഒരു ഗുണവും ഈച്ചയെക്കൊണ്ട് ഇല്ല. ഏതാണ്ട് നൂറിലധികം അസുഖങ്ങൾ പരത്തുന്നത് ഈച്ച തന്നെ....
പരമ വൃത്തിക്കാരനായ പൂച്ചയും ഈ ഈച്ചയും തമ്മിൽ എങ്ങനെ ചങ്ങാതിമാരായെന്നത് ഒരു കഥ പോലെ തന്നെ ഉത്തരമില്ലാത്ത ചോദ്യം തന്നെ, അല്ലേ....

എന്തായാലും ഒരു ഈച്ചയുടെ ഒരു ദിവസം എങ്ങനെയാണന്നും ഒന്നു കാണാം.....


Sunday, April 4, 2010

അത്യാഗ്രഹം നല്ലതല്ല ..... ..അനുബന്ധം.....


 അത്യാഗ്രഹം  നല്ലതല്ല ..... .(അനുബന്ധം.....)
നായ എന്നും മനുഷ്യന്റെ സന്തത സഹചാരിയായിരുന്നു. വനവാ‍സിയായിരുന്ന മനുഷ്യന്‍, നദീതടസംസ്കാരത്തിന്റെ വികാസത്തില്‍ ഒപ്പം കൂട്ടിയ മൃഗങ്ങളില്‍ ഒന്നാണല്ലോ നായ. ഭാരതീയ പുരാണത്തില്‍, പാണ്ഡവന്മാരുടെ സ്വര്‍ഗ്ഗാരോഹണസമയത്തു പോലും, എല്ലാ പ്രതിബന്ധങ്ങളിലും അവസാനം വരെ അനുഗമിച്ച നായയെപ്പറ്റി കേട്ടിട്ടില്ലേ.... പുരാതന ഈജിപ്തില്‍ നായയുടെതിനു സമാനമായ തലയോടുകൂടിയ ‘അനുബിസ്’ എന്ന ഒരു ദേവന്‍ ഉണ്ടായിരുന്നത്രേ. പുരാതന ഈജിപ്ഷ്യന്‍ ‘മമ്മി’കളുടെ സംരക്ഷകനായാണ് ഈ ദേവന്‍ അറിയപ്പെട്ടിരുന്നത്

നായ, ചെന്നായയുടെ വംശത്തില്‍ നിന്നുള്ളതാണ്. നായ്ക്കള്‍ ഏതാണ്ട് 800ലധികം തരത്തിലുണ്ട്. ശാസ്ത്രകാരന്മാരുടെ കണക്കനുസരിച്ച് നായ്ക്കള്‍ ഭൂമിയില്‍ വന്നിട്ട് ഏതാണ്ട് 8000 – ലധികം വര്‍ഷങ്ങളായി. മനുഷ്യന്‍ ഏറ്റവും ആദ്യം മെരുക്കിയെടുത്ത മൃഗവും നായ തന്നെ.

ഘ്രാണശേഷിയും, അനുസരണയും, വിശ്വസ്തതയും ആണ് നായ്ക്കളെ വ്യത്യസ്തരാക്കുന്നത്. മനുഷ്യനുള്ളറ്റിന്റെ ഏതാണ്ട് പത്തുലക്ഷം മടങ്ങ് ഘ്രാണശക്തി നായ്ക്കള്‍ക്കുണ്ടത്രേ. ഏതാണ്ട് 15 വര്‍ഷമാണ് നായകളുടെ ആയുസ്സ്. 60-64 ദിവസമാണ് നായയുടെ ഗര്‍ഭകാലം. പൂര്‍ണ്ണവളര്‍ച്ചയെത്തിയ ഒരു നായ്ക്ക് 42 പല്ലുകള്‍ ഉണ്ടാവും. നല്ല ഓട്ടക്കാരാണ് നായ്ക്കള്‍, ഇതില്‍ വമ്പന്‍, മണിക്കൂടില്‍ 45 മൈല്‍ വരെ വേഗത്തില്‍ ഓടുന്ന ഗ്രേഹൌണ്ട് ഇനത്തില്‍ പെടുന്നവയാണ്.

എല്ലാ കാര്യത്തിനും മനുഷ്യന്റെ കൂട്ടിന് നായ ഉണ്ടായിരുന്നല്ലോ. മനുഷ്യന്‍ ബഹിരാകാശത്ത് യാത്ര നടത്തുന്നതിനു മുന്‍പ്, ഒരു പരീക്ഷണമെന്ന നിലയില്‍ ആദ്യം അയച്ചത് ‘ലെയ്ക്ക’ എന്ന നായയെ ആയിരുന്നു. 1957-ല്‍, റഷ്യയുടെ ബഹിരാകാശ വാഹനമായ സ്പുട്നിക്കില്‍ ബഹിരാകശത്തേക്കു പോയ, ആദ്യത്തെ ജീവജാലമായ ലെയ്ക്ക പക്ഷെ, തന്റെ ജീവന്‍ തന്നെ മനുഷ്യന്റെ ശാസ്ത്ര ജിജ്ഞാസക്കു വേണ്ടി ബലിയര്‍പ്പിച്ചു. ലെയ്ക്കക്ക് ഒരു തിരിച്ചു വരവ് ഇല്ലായിരുന്നു
മിടുക്കന്മാരായ ചില നായ്ക്കുട്ടന്മാരുടെ കുസൃതിത്തരങ്ങൾ ഒന്നു കണ്ടുനോക്കൂ..... 


 ഇനി നമുക്കൊരു നായ്ക്കുട്ടിയെ വരയ്ക്കാൻ പഠിയ്ക്കാം...


എന്റെ പരിമിതമായ വായനയില്‍ നിന്ന് കിട്ടിയ ചില അറിവുകളാണ് ഇവിടെ പറഞ്ഞത്. എന്റെ പ്രിയപ്പെട്ട സുഹൃത്തുക്കളുടെ അറിവുകള്‍ കമന്റിനൊപ്പം ചേര്‍ത്താല്‍ അതൊക്കെ ഈ സമ്പാദ്യപ്പെട്ടിക്ക് മുതല്‍ക്കൂട്ടാകും... എല്ലാപേര്‍ക്കും നന്ദി....